History of Maharashtra

कोपर्डी खटला - जातीयवादामुळेच मुख्य आरोपी केल्याचा कांगावा

अहमदनगर । DNA Live24 - कोपर्डी (ता. कर्जत) येथील अल्पवयीन मुलीवर अत्याचार करुन मी तिचा खून केला नाही. या गुन्ह्यात कारण नसताना माझे नाव गोवण्यात आले. पोलिसांनी जातीयवादातून मला अटक केली, असा कांगावा मुख्य आरोपी जितेंद्र उर्फ पप्पु शिंदे याने केला. बुधवारी त्याचा जबाब नोंदवण्यात आला. आपल्याला कोणतेही साक्षीदार तपासायचे नसल्याचे त्याने सांगितले.

जिल्हा सत्र न्यायाधीश सुवर्णा केवले यांच्यासमोर कोपर्डी खटल्याची सुनावणी सुरू आहे. आतापर्यंत सरकार पक्षाने एकूण ३१ साक्षीदार तपासले. बुधवारी दुपारी मुख्य आरोपी जितेंद्र उर्फ पप्पु शिंदे याचा जबाब नोंदवण्यात आला. खटल्यात आपल्यासमोर सादर झालेले सर्व साक्षीपुरावे समजल्याचे त्याने मान्य केले.

काही साक्षीदारांनी शिंदे याला घटनास्थळावरुन पळताना पाहिले, त्याचा पाठलाग केला, त्यावेळी त्याची चप्पल बाजरीच्या शेतात पडली, तो आईच्या हाताला हिसका देवून पळाल्याचे सांगितले होते. पप्पू शिंदेने मात्र जबाबात या गोष्टी खोट्या असल्याचे सांगितले. वैद्यकीय व दंतवैद्यकीय तपासणी केल्याचा त्याने इन्कार केला.

घटनेच्या वेळी अंगावर असलेले व नंतर पोलिसांनी जप्त केलेलेे कपड्यांबद्दल आपल्याला काही माहित नसल्याचे शिंदे म्हणाला. पोलिसांनी जप्त केलेली मोटारसायकल आपली नसल्याचे, ती विकत घेतल्याचे खोटे असल्याचे त्याने सांगितले. तसेच आपल्या घरातून पोलिसांनी मोबाईल व अश्लील सीडीज जप्त केल्याबद्दलही माहिती नसल्याचे त्याने नमूद केले.

पोलिसांनी त्याच्या गळ्यातील माळ जप्त केल्याविषयी सांगताना आपण माळच घालत नसल्याचे तो म्हणाला. स्वत:ची अटकपूर्व वैद्यकीय तपासणी झालेली नसल्याचे शिंदेने सांगितले. अटकेच्या कारवाई खोटी असल्याचे तो म्हणाला. तिसऱ्या क्रमांकाचा आरोपी नितीन भैलुमे हा मावसभाऊ असल्याचे व तो कोपर्डीतच रहात असल्याचे मात्र शिंदेने मान्य केले. 

ज्या क्रमांकाचे सिमकार्ड पोलिसांनी जप्त केले, तेही आपलेच असल्याचे त्याने नमूद केले. मोबाईलमध्ये अश्लील क्लीप्स असल्याबद्दल, तसेच स्वत:चा रक्तगट आपल्याला माहिती नसल्याचे शिंदेने जबाबात सांगितले.

सायकल जप्ती - मुख्य आरोपी जितेंद्र शिंदे याच्या वतीने काम पाहणाऱ्या विधी सेवा प्राधिकरणचे अॅड. योहान मकासरे यांनी पीडितेच्या सायकलच्या जप्तीबद्दल एक अर्ज न्यायालयात सादर केला. दोषारोपपत्रामध्ये सायकल जप्त केलेली तारिख नमूद आहे. एका वर्तमानपत्रात मात्र नंतरच्या तारखेला या सायकलचे छायाचित्र प्रसिद्ध झालेले आहे. त्यावरुन सायकल जप्त केल्याच्या तारखेबद्दल त्यांचा आक्षेप अाहे. या अर्जासोबत अॅड. मकासरे यांनी वर्तमानपत्राचे कात्रणही जोडले.

क्रीडा प्रमाणपत्र - पीडित मुलगी खो-खोपटू असल्याचे साक्षीपुराव्यांत समोर आले आहे. मात्र, अॅड. मकासरे यांनी जिल्हा क्रीडा अधिकारी कार्यालयात त्याबद्दल माहितीच्या अधिकारात माहिती मागवली होती. त्यात मात्र पीडितेचा तसा काहीच उल्लेख नसल्याचे समोर आले, असे अॅड. मकासरे यांचे म्हणणे आहे. ही कागदपत्रे त्यांनी न्यायालयात सादर केली.
Reactions:

टिप्पणी पोस्ट करा

ताज्या बातम्या

[recent][timeline]

संपर्क फॉर्म

नाव

ईमेल *

संदेश *

Blogger द्वारा समर्थित.
Javascript EnablePlease Enable Javascript To See All Widget