History of Maharashtra

थरारक पाठलाग करुन पकडला १ कोटीचा गांजा


अहमदनगर । DNA Live24 - तोफखाना पोलिसांनी संशयास्पद वाहनांचा वीस मिनिटे थरारक पाठलाग करुन आशा टॉकीज चौकात वाहने अडवली. त्यातून तब्बल ६४३ किलोग्राम गांजा जप्त करण्यात आला. उस्मानाबादहून आणलेला हा गांजा नगरमध्ये वितरित होणार होता. जवळपास १ काेटी रुपयांचा गांजा, १७ लाखांची दोन चारचाकी वाहने, रोकड असा एकूण १ कोटी १४ लाख ३९ हजार रुपयांचा मुद्देमाल पोलिसांनी हस्तगत केला. पोलिस अधीक्षक रंजनकुमार शर्मा यांच्या मार्गदर्शनाखाली तोफखान्याचे पोलिस निरीक्षक राकेश मानगावकर यांच्या टीमने शनिवारी सकाळी ही कामगिरी केली.

पोलिस निरीक्षक मानगावकर, पोलिस हेड कॉन्स्टेबल संजय इस्सर, कॉन्स्टेबल योगेश भिंगारदिवे, संजय काळे, धिरज अभंग, भास्कर गायकवाड, महिला कॉन्स्टेबल छाया आढाव, हारुण शेख हे औरंगाबाद रस्त्यावर सरकारी जीपमधून गस्त घालत होते. सकाळी साडेसहाच्या सुमारास हॉटेल सनी पॅलेससमोर त्यांना औरंगाबादच्या दिशेने एक इनोव्हा (क्र. एमएच २४ व्ही १६९९) व पांढऱ्या रंगाची बोलेरो जीप (क्र. एमएच १७ एजे ६९४३) भरधाव वेगाने येताना दिसल्या. पोलिसांनी त्यांना थांबण्याचा इशारा केला.

पण, दोन्ही वाहने वेगाने नगरच्या दिशेने पुढे गेली. तोफखाना पोलिसांनी सरकारी जीपमधून दोन्ही वाहनांचा पाठलाग केला. इनोव्हा व बोलेरो वाहने एकापाठोपाठ वेगाने पोलिस अधीक्षक चौकातून पुढे गेली. पोलिसांचा पाठलाग सुरूच होता. दोन्ही वाहनांनी हायवे सोडून शहरात प्रवेश केला. सुमारे वीस मिनिटे हा पाठशिवणीचा खेळ चालला. ६ वाजून ५० मिनिटांच्या सुमारास पोलिसांनी आशा टॉकीज चौकामध्ये दोन्ही वाहनांना अडवले. इनोव्हा कारमध्ये एक पुरुष व महिला, तर बोलेरो जीपमध्ये दोन पुरुष व एक महिला होते.

गाड्यांमध्ये मागच्या बाजूला राखाडी रंगाची काही पाकिटे रचलेली दिसली. पोलिसांनी चौकशी केली असता गाडीत बसलेल्या लोकांनी पाकिटांमध्ये गांजा असल्याची कबुली दिली. पोलिसांनी सर्व मुद्देमाल, वाहने ताब्यात घेतली. इनोव्हा कारमध्ये संदीप दिलीप अनभुले (२८, घुमरी, कर्जत) व सीमा राजू पंचारिया (४६, कासारदुमाला, संगमनेर), तर बोलेरोमध्ये सागर भिमाजी कदम (२८, आश्वी, संगमनेर), गणेश निवृत्ती लोणारी (जोर्वे, संगमनेर) व शोभा कृष्णा कोकाटे (नालेगाव, नगर) यांना अटक केली.

सीमा पंचारिया हिच्याकडून ८६ हजार ५०० रुपयांची रोकड जप्त केली. इनोव्हा कारमध्ये १५०, तर बोलेरो जीपमध्ये १३६ राखाडी रंगाची चौकोनी पाकिटे होती. प्रत्येक पाकिट अडीच किलोग्राम वजनाचे होते. त्यात सुकलेला गांजा मिळून आला. इलेक्ट्रॉनिक वजनकाट्याने मुद्देमाल मोजला. याप्रकरणी तोफखाना पोलिस ठाण्यात एन. डी. पी. एस. अॅक्टच्या कलमांनुसार गुन्हा नोंदवण्यात आला आहे. या गुन्ह्याचा अधिक तपास पोलिस निरीक्षक मानगावकर हे करीत आहेत.
Reactions:

टिप्पणी पोस्ट करा

ताज्या बातम्या

[recent][timeline]

संपर्क फॉर्म

नाव

ईमेल *

संदेश *

Blogger द्वारा समर्थित.
Javascript EnablePlease Enable Javascript To See All Widget