728x90 AdSpace

[recent][timeline]
Latest News

शेतात कष्ट उपसणारा राहुल दहावी परीक्षेत केंद्रात प्रथम


अहमदनगर । DNA Live24 - घरची आर्थिक परिस्थिती बेताची असल्यामुळे त्याने पालकांसोबत शेतात घाम गाळून कष्ट उपसले. घरकामातही मदत केली. हे करताना स्वत:च्या अभ्यासाकडेही काळजीपूर्वक लक्ष दिले. परिणामी तो नुसता पासच नाही झाला, तर दहावीच्या परीक्षेत केंद्रात प्रथम येण्याचा मानही त्याने पटकावला. हे आदर्श उदाहरण आहे नगर तालुक्यातील बहिरवाडी (वाकी वस्ती) येथील राहुल सुखदेव दारकुंडे या दहावी उत्तीर्ण झालेल्या विद्यार्थ्याचे.

राहुलने शेतकरी कुटुंबात जन्माला येवून इयत्ता दहावीच्या परीक्षेत ९५.०२ टक्के गुण मिळवले आहेत. तेा जेऊर बायजाबाईचे केंद्रात प्रथम आला आहे. राहुलने हे यश निव्वळ वैयक्तिक कठोर मेहनतीच्या बळावर मिळवले. घरची आर्थीक परिस्थिती अत्यंत बेताची असल्याची राहुलला सुरुवातीपासून पूर्वकल्पना होती. त्यामुळे त्याने कोठेही खासगी शिकवणी लावली नाही.

आई-वडिलही फारशे शिकलेले नसल्यामुळे घरी अभ्यास घ्यायलाही कुणी नाही. तरीही परिस्थिती जाण असल्याने राहुलने पालकांना शेतीच्या कामात मदत केली. आईलासुद्धा घरकामात मदत केली. दहावीच्या परीक्षेतील दैदिप्यमान कामगिरीमुळे राहुलने इतर विद्यार्थ्यांसमोर वेगळाच आदर्श ठेवला आहे. त्याबद्दल त्याच्या आदर्श विद्यालयाच्या वतीने त्याचा नुकताच सत्कार करण्यात आला. 

या सत्कार सोहळ्याला बहिरवाडी गावचे सरपंच विलास काळे, भास्कर नाना आव्हाड, संदीप आव्हाड,  सीताराम दारकुंडे, संजय येवले, विघ्नहर्ता मित्र मंडळाचे (घोडेगाव, ता. नेवासे) अध्यक्ष दीपक इखे, उपाअध्यक्ष गणेश जाधव  व बहिरवाडी ग्रामस्थ मोठ्या संख्येने उपस्थित होते. विघ्नहर्ता मित्र मंडळाने राहुलच्या पुढील शिक्षणाकरिता लागणाऱ्या पुस्तके व गणवेशाचा खर्च उचलला आहे.
  • Google Comments
  • Facebook Comments
Item Reviewed: शेतात कष्ट उपसणारा राहुल दहावी परीक्षेत केंद्रात प्रथम Rating: 5 Reviewed By: DNA Live24