History of Maharashtra
Latest Post


पुणे : DNA Live24-
छत्रपती शिवाजी महाराजांच्या जयंतीनिमित्त शिवनेरी गडावर मुख्यमंत्री देवेंद्र फडणवीस यांच्या उपस्थितीत शिवजन्मोत्सव सोहळा पार पडला. यावेळी मुख्यमंत्री देवेंद्र फडणवीस यांनी छत्रपती शिवाजी महाराजांच्या प्रतिमेला वंदन केले.
यावेळी ग्रामविकास मंत्री पंकजा मुंडे, शिक्षण मंत्री विनोद तावडे, पर्यटन मंत्री जयकुमार रावल, आमदार शरद सोनावणे, विभागीय आयुक्त चंद्रकांत दळवी, विशेष पोलीस महानिरीक्षक विश्वास नांगरे-पाटील, जिल्हाधिकारी सौरभ राव, जिल्हा पोलीस अधीक्षक सुवेज हक उपस्थित होते.
मुख्यमंत्री देवेंद्र फडणवीस यांचे शिवनेरी गडावर आगमन झाल्यावर त्यांनी शिवजन्मोत्सव स्थळी भेट दिली. त्याठिकाणी पाच सुवासिनींनी सजविलेल्या पाळण्यात बाल शिवाजींच्या मुर्तीला जोजवून पाळणा गीत म्हटले. त्यानंतर मुख्यमंत्री श्री. फडणवीस यांनी शिवछत्रपतींची पालखी घेवून पालखीतील शिवछत्रपतींच्या प्रतिमेला पुष्पहार अर्पण केला. त्यानंतर गडावर असणाऱ्या मंदिरातील राजमाता जिजाऊ आणि बाल शिवरायांच्या पुतळ्याला पुष्पहार अर्पण करून वंदन केले.
छत्रपती शिवाजी महाराजांच्या जयंतीनिमित्त प्रशासनाच्यावतीने शिवनेरी गडावर मोठी तयारी करण्यात आली होती. यावेळी गडावर साहसी खेळांचे प्रात्यक्षिके पार पडली. शिवनेरी गडावर राज्यभरातून शिवप्रेमींची उपस्थिती होती.

मुंबई : DNA Live24
फेसबुक फ्रेंडला पहिल्यांदाच भेटायला गेलेल्या 20 वर्षीय तरुणीला आपला जीव गमावावा लागला आहे. मुंबईजवळील नालासोपारामध्ये हा धक्कादायक प्रकार घडला आहे. तरुणीला शारीरिक संबंधानंतर रक्तस्त्राव सुरु झाला, मात्र तिने डॉक्टरकडे जाण्यास नकार दिल्यानं 25 वर्षीय तरुणाने तिची हत्या केली.

वाशीमध्ये राहणाऱ्या 20 वर्षीय तरुणीची नालासोपाऱ्यातील हरीदास निरगुडे या 25 वर्षीय तरुणाशी फेसबुकवर ओळख झाली. गेल्या काही महिन्यांपासून दोघांमध्ये चॅटिंगही सुरु होतं. अखेर त्यांनी नालासोपाऱ्यात भेटायचं ठरवलं. ठरल्याप्रमाणे काल रविवारी तरुणी वाशीहून नालासोपाऱ्याला तरुणाच्या घरी भेटायला आली. भेटीवेळी तरुणानं तरुणीकडे शरीरसंबंधांची मागणी केली. दोघांमध्ये शारीरिक संबंधही झाले. मात्र तरुणीला रक्तस्त्राव सुरु झाला. तरुणाने तिला डॉक्टरकडे जाण्यास विचारलं. तरुणीने त्याला नकार दिला आणि निघण्याचा प्रयत्न केला. मात्र शूजची लेस गळ्याला आवळत तरुणाने तिची हत्या केली.

तरुणीची हत्या करुन हरीदासने तिचा मृतदेह इमारतीच्या तळमजल्यावर पायऱ्यांशेजारी ठेवला. इमारतीतील रहिवाशांनी हा मृतदेह पाहून पोलिसांना याची माहिती दिली. पोलिसांनी इमारतीतील रहिवाशांकडे तरुणीबद्दल चौकशी केली, मात्र तिला कुणीही ओळखत नसल्याचं सांगितलं.

दरम्यान हरीदासच्या फ्लॅटमध्ये तरुणीच्या रक्ताचे डाग दिसून आले. त्यामुळे पोलिसांनी त्याची कसून चौकशी केली. यावेळी हरीदासने आपणच तरुणीची हत्या केल्याचं कबूल केलं. तसंच आपण शारीरिक संबंध ठेवल्याचही कबूल केलं. हा तरुण नालासोपाऱ्यात आपल्या बहिणीसोबत राहात होता. ज्यावेळी हे दोघं भेटले त्यावेळी आरोपीची बहिण घरी नव्हती. तरुणाच्या बेडवरही रक्ताचे डाग आढळून आले आहेत.

DNA Live24 । आठवणींच्या हिंदोळ्यावर

छायाचित्र सौजन्य - गुगल
ला  निटसं आठवत नाही आता. पण त्यावेळी मी साधारण पहिली  किंवा  दुसरी इयत्तेला असेल. त्यावेळी  आमचे आप्पा आम्हाला शेवगाववरुन खास मोहट्याच्या देवीला घेऊन आले होते. आम्ही  भावंडं, ताई, आणि  आप्पा. आताच्या वेळी  मोहटा देवीच्या गडावर ज्या सुविधा आहेत, त्यावेळी त्या काहीच नव्हत्या. रखरखत्या  ऊन्हात एसटीतुन उतरायचं आणि पायऱ्या चढून देवीच्या दर्शनाला जायचं. अक्षरशः सगळ्यांची दमछाक  व्हायची. देवीचा गडही ओसाड असायचा आणि तुरळक माणसं असायची. उन्हात पाय-या चढुन गेलं की खुप तहान लागायची. देवीचं दर्शन घ्यायचं आणि गडावर कुठे पाणी मिळतं का ते पहायचं.. अशा वेळी गडावर  मिळालेलं पाणी अक्षरश: अमृत  वाटायचं. 

असंच एकदा आम्ही दर्शन घेऊन मंदिराला प्रदक्षिणा घालत असताना मागच्या बाजूला असलेल्या एका कोपर्‍यात माझे वडील थांबले. तिथं एक वयस्कर आजोबा स्टोव्हवर भजी तळत होते. स्टोव्हचा आवाज जोरात चालू असल्याने सगळे मोठ्या आवाजात बोलत होते. आम्ही लहान भावंडं तिथंच खेळत होतो. अन अचानक  भज्यांचा वास सगळीकडे दरवळला. तशी भजे खाण्याची सगळ्यांची तीव्र इच्छा झाली. आम्ही खेळणं थांबवून  त्या कढईतल्या भज्यांकडे पहात होतो. गरमागरम भज्यांच्या घाणा निघाला आणि आजोबांसोबत असलेल्या  एका आजीने हसतमुखाने आम्ही भजे मागायच्या आत छोट्या छोट्या कागदाच्या तुकड्यांवर आम्हाला  गरमागरम कांदा-भजी दिली. 

इतका आनंद झाला त्यावेळी. त्या बालपणीच्या आनंदाला आत्ताच्या कोणत्याही आनंदाची सर नाही. जणु  त्या आजीला आम्हाला काय पाहिजे हाेतं, याची जाणीव झाली होती. मी भजी खात खात त्या माऊलीचा चेहरा न्याहाळत होतो. हसतमुखाने आणि आस्थेने ती आप्पा आणि ताईबरोबर बोलत होती. आप्पा पोलिस असल्याने त्यांच्या बोलण्यात एक रुबाब होता. पण ती दोघं मायेने सगळ्यांची विचारपूस करत होती. जातांना पाथर्डीला थांबुन घरी येण्याचा आग्रह करीत होती. भजी खाऊन आणि माठातलं गार पाणी पिऊन आम्ही सगळे खाली निघालो. पण त्या माऊलीचा हसतमुख चेहरा डोळ्यासमोरुन जात नव्हता. 

ती माऊली म्हणजे आपली 'बाई'. अशी बाईची आणि माझी पहिली भेट झाली. त्यावेळी असं मनातही आलं नाही की हिच माऊली पुढे आपल्या बहिणीची सासू होणार आहे. सुनितालाही वाटलं नसेल की हीच माझी भावी  सासू होइल. काही वर्षांनी आमचे आप्पाही वारले. गरीबी आणि हलाखीचे दिवस चालु झाले होते. सुनिता आणि ताई लोकांची घरकाम करायची. इकडे मी, सुधीर आणि बाळी अजून शिक्षणच घेत होतो. अचानक एक दिवस घरात सुनिताच्या लग्नाचा विषय निघाला. रमेशभाऊ घरी आला व मला पाथर्डीला घेऊन गेला. तेव्हा मी नववी दहावीला असेल. पण घरात मीच मोठा असल्याने तो मला घेऊन गेला. 

पाथर्डीला गेल्यावर घर बघितलं. भावजींना भेटलो आणि जेवत असताना माझं लक्ष 'बाई'कडे गेलं. मला अचानक आठवलं की, ह्या तर लहानपणी गडावर दिसलेल्या आज्जी ! आज्जी परत दिसल्याचा मनात आनंद झाला. तिथून जाताना बाई आणि नानांच्या पाया पडून निघालो. घरी आल्याबरोबर सुनिताला बाकीचं काही नाही, पण एक सांगितलं. "सुनिता तुझी सासु खुप चांगली आहे." तर अशी झाली बाईची आणि माझी पुन्हा दुस-यांदा भेट. सुनिताचं लग्न झालं. अन माझ्या पाथर्डीला चकरा वाढल्या. कधी मोहट्याच्या देवीला, तर कधी खास सुनिताला भेटायला. 

मी नोकरीला लागायच्या आधीची गोष्ट. एक दिवस असाच माझा मित्र आणि मी मोहट्यावरुन पाथर्डीला आलो. बाई नाना घरात बसलेले होते. बाईला मला पाहून खुप आनंद झाला. तसा तो नेहमीच व्हायचाही. वाड्यातलं बाईचं घर जरी  छोटं असलं तरी तिच्यासाठी ते संपूर्ण विश्व होतं. विशिष्ट पध्दतीने मांडी घालुन दारात हसतमुखाने बसलेले नाना आणि नेहमी त्यांच्या आसपास असणारी बाई. हे आजही डोळ्यासमोर आहेत. बाईने माझी आणि मित्राची चौकशी करून जेवायला तुमच्या आवडीचं काय करु म्हणून विचारलं. मी नको नको म्हणत होतो. पण सुनिताने सांगितलंच. बाई, गणेशला काळ्या मसाल्याचं वांगं आणि चुलीवरची बाजरीची भाकरी आवडते. झालं. बाईने लगेच खास काळ्या मसाल्याची वांग्याची भाजी आणि बाजरीच्या भाकरी करुन आग्रह करुन करुन मला आणि मित्राला पोटभर खायला घातलं. आम्ही तृप्त मनाने बाईच्या स्वयंपाकाची स्तुती केली. बाईलाही खुप आनंद झाला. 

या प्रसंगानंतर मला आठवतंय मी ज्या-ज्या वेळी पाथर्डीला गेलो, त्या-त्या वेळी बाईने शक्य होईल तेवढ्या वेळी मला वांग्याची भाजी आणि भाकरी खाऊ घातली. आजही घरी वांग्याची भाजी आणि भाकरी खाताना बाईची खूप आठवण येते.

संच एकदा नविनच लग्न झालेलं असताना गाडीवर मोहट्याला गेलो. गडावरचा लहानपणीचा भज्यांचा किस्सा स्वातीला सांगितला. येताना साहजिकच पाथर्डीला आलो. वाड्यातील सगळ्यांना भेटलो. बाई नानांच्या  पाया पडलो. त्यावेळी बाईने मायेने आमच्या दोघांच्या तोंडावरून फिरवलेला चरबट झालेला अनुभवी हात आम्हाला मोरपीसांसारखा वाटला. माझी लहानपणीपासुनची फरपट बाईने पाहिली होती. म्हणुन तिला माझी हळुहळु होत असलेली प्रगती पाहून खुप आनंद व्हायचा. आपलं नवीन घर झाल्यावर आम्ही दोघांनी एकदा बाई आणि नानांना घरी येण्याचा खुप आग्रह केला. पण ते काही तयार होत नव्हते. सुनिताही म्हणाली, "अरे गणेश,  ते दोघं कधीही पाथर्डी सोडून कुठेच जात नाहीत. पण माझ्या आणि स्वातीच्या आग्रहामुळे दोघेही यायला तयार झाले. अन पुढच्या आठवड्यात येऊ, असे म्हणाले.

खरोखरच त्यानंतर चार पाच दिवसांनी बाई आणि नाना आलमगीरला आमच्या घरी आले. आम्हा दोघांना इतका आनंद झाला. कारण 'बाई आणि नाना' या जोडीबद्दल पहिल्यापासूनच आमच्या मनात प्रचंड आदर हाेता. कळस म्हणजे बाईने पाथर्डी वरुन येताना खास माझ्यासाठी बाजरीची भाकरी आणि काळ्या मसाल्याची वांग्याची भाजी करुन आणली होती. आल्याबरोबर तिने फडक्यातली भाकरी सोडली व मला लगेच खा,  म्हणाली. 'तुला आवडते ना? म्हणुन करुन आणली." सुदाम्याने श्रीकृष्णाला पुरचुंडीत बांधुन आणलेल्या पोह्यांची सर त्या भाजीत आणि भाकरीत होती. आजही हे लिहिताना अक्षरशः डोळ्यातून पाणी येतंय. 😪😪😪😪 

घराच्या दाराजवळ बसलेली बाई, येणाऱ्या जाणाऱ्यांना आपुलकीने विचारपूस करणारी बाई, हक्काने सगळ्यांना चहाचा आग्रह करणारी बाई, म्हणजे एक हसमुख अजब रसायन होतं. घरच्या गरीबीची बाईला जाणीव होती. पण मनाची ओसंडून वाहणारी श्रीमंती तिने तसूभरही कमी होवू दिली नाही. बाईंच्या स्वभावाचं आणखी एक वैशिष्टय़ म्हणजे बाईची कुणाबद्दलही काहीएक तक्रार नसायची. बाईची पाथर्डीशी मनाने घट्ट नाळ जुळलेली होती. तिने शेवटपर्यंत ती कायम ठेवली. पाथर्डी म्हणजे बाईंसाठी संपूर्ण जग होतं.

न अचानक त्या दिवशी सकाळीच भावजींचा फोन आला, गणेश आपली बाई गेली. एका क्षणात सगळ्या घटना, आठवणी डोळ्यासमोर उभ्या राहिल्या. बाईबद्दल लिहावं तेवढं थोडंच आहे. आठवणींच्या रुपाने बाई सदैव आपल्यातच राहिल. अशा निर्मळ मनाच्या माऊलीस आपल्या सर्वांकडून भावपूर्ण श्रद्धांजली.!!!

जो आवडतो सर्वांना
तोचि आवडे देवाला.!

- गणेश लकारे, आलमगीर, नगर
(लेखक पोलिस दलात नोकरीला आहेत)


मुंबई : प्रतिनिधी
'काश्मीर प्रश्नाचा पकोडा उकळत्या तेलातच फुटला आहे', असं म्हणत 'सामना'तून पुन्हा एकदा मोदी सरकारच्या कारभारावर प्रश्न उपस्थित केला गेला आहे.

'देश गंभीर संकटात असताना सरकार मात्र ‘पकोडे-भजी’ यावरच्या चर्चेत गुंतवून ठेवला जात आहे, असंही 'सामना'त म्हटलं आहे.

'काँग्रेसने दहशतवाद्यांसमोर गुडघे टेकले हा आरोप जे करीत होते त्यांनी गेल्या चार वर्षांत पाकड्यांचे गुडघे फोडले काय किंवा दहशतवाद्यांचे कंबरडे मोडले काय?' असा सवालही सामनातून मोदींना करण्यात आला आहे.

एक नजर ‘सामना’च्या अग्रलेखावर

कश्मीर प्रश्नाचा पकोडा फुटला आहे!

* पाकिस्तानला जगात एकाकी पाडल्याचे बोलले जाते, पण पाकिस्तान व त्यांचे दहशतवादी हिंदुस्थानची नाडी कश्मीरात रोज सोडत आहेत व त्यामुळे तिरंग्यास मान खाली घालावी लागत आहे. देश गंभीर संकटात असताना ‘पकोडे-भजी’ यावर चर्चेत गुंतवून ठेवायचे व कश्मीरात आमच्या जवानांनी रोजच शहीद व्हायचे. मोदी सरकारला सत्तेवर येऊन चार वर्षे झाली आहेत. कश्मीर प्रश्नाचा पकोडा उकळत्या तेलातच फुटला आहे. जवान मरत आहेत व कश्मिरी पंडित अजूनही निर्वासित आहेत.

* जम्मू-कश्मीरमधील परिस्थिती हाताबाहेर गेली आहे व दिल्लीच्या धमक्या पोकळ ठरवल्या जात आहेत. गेल्या आठ दिवसांत सीमेवर ज्या घटना घडत आहेत त्या फक्त चिंताजनक नाहीत तर बलाढ्य व शक्तिमान म्हणून मिरवणाऱ्या देशाला मान खाली घालायला लावणाऱ्या आहेत.

* गेल्या महिनाभरात पाकड्यांनी शंभरदा घुसखोरी व गोळीबार केला आणि त्यात आमचे पंधरा जवान शहीद झाले तरी आमच्या देशात ‘पकोडे’ व ‘भजी’ तळण्यावर राजकीय चर्चा सुरू आहे. पाकिस्तानला चोख उत्तर देऊ असे रोज बोलले जात आहे, पण राज्यकर्त्यांना उत्तर सापडत नाही काय? कश्मीर प्रश्नांचा सत्यानाश पंडित नेहरूंनी केला व काँग्रेस पक्षाला हा प्रश्न सोडवता आला नाही म्हणून भारतीय जनता पक्षाच्या हातात जनतेने राज्य दिले आहे. काँग्रेस पक्षाने या प्रश्नी नालायकी दाखवली व दहशतवाद्यांसमोर गुडघे टेकले हा आरोप जे करीत होते त्यांनी गेल्या चार वर्षांत पाकड्यांचे गुडघे फोडले काय किंवा दहशतवाद्यांचे कंबरडे मोडले काय?

* पाकिस्तानला धडा शिकविण्याची हिंमत काँगेस पक्षात नव्हती, पण इंदिरा गांधी यांनी पाकिस्तानचा पराभव करून फाळणी केली होती. हिमतीचेच काम बाईंनी तेव्हा केले होते व त्या वेळी अमेरिका हिंदुस्थानच्या विरोधात पाकिस्तानच्या बाजूने होती. आज अमेरिका मोदी यांच्या खिशात आहे व फ्रान्स, जर्मनी, इस्रायलसारखी राष्ट्रे मोदींच्या तालावर डोलत असल्याचे कानावर येते. पाकिस्तानला जगात एकाकी पाडल्याचे बोलले जाते. अमेरिकेने पाकिस्तानच्या आर्थिक नाड्या आवळल्याचा आनंद दिल्लीने साजरा केला, पण पाकिस्तान व त्यांचे दहशतवादी हिंदुस्थानची नाडी कश्मीरात रोज सोडत आहेत व त्यामुळे तिरंग्यास मान खाली घालावी लागत आहे.

DNA Live24 । डॉ. संजय सोनवणे 

वेळ सकाळी ११.३०, १२ ची. डॉक्टर आहेत का? असे विचारत एक मध्यमवयीन महिलेने ओपीडीमध्ये प्रवेश केला. तिचा चेहरा खूप संतापलेला, त्रासलेला दिसला.

"काय झालंय?" - माझा आपला नेहमीचा प्रश्न.

ती चिडून संतापाने उत्तरली - "काय झाले नाही हे विचारा डॉक्टर.

अन तिने तिची कर्मकहाणी सांगायला सुरुवात केली. 
"इतर मुली जसे संसाराचे मनी चित्र रंगवतात अगदी तसेच झाले. माझे शिक्षण सर्व अगदी व्यवस्थित झाले. छान उपवर मुलगाही मिळाला. संसार अगदी मजेत चालू होता. संसार वेलीवर पहिली मुलगी झाली. ती आत्ता १२ वर्षाची आहे. आणि लहानी ९ वर्षांची. अडचणीला खरे तर सुरुवात झाली ती लहान मुलीच्या वेळी गर्भवती राहिल्यानंतर. पोटावर एक पांढरट डाग आला. डॉक्टरांना दाखवले. पण गरोदरपणामुळे होऊ शकते, म्हणून दुर्लक्ष केले. डिलेव्हरीही व्यवस्थित झाली आणि संसारही अगदी छान चालू होता.

पण अगदीच माझ्या संसाराला ग्रहण लागावे तसेच झाले. मागील काही दिवस दुर्लक्ष केलेला डाग आत्ता त्याचे स्वरूप दाखवू लागला. आत्ता काही डाग पायावर छातीवर आणि मानेवर फिक्कट रुपात दिसू लागले. गावातील स्थानिक डॉक्टरांनी काही विटामिन्सची कमतरता असेल म्हणून उपचार करून पहिले. पण काही परिणाम नाही.

त्यानंतर शहरातील त्वचारोग तज्ञांनी पांढरे डाग, कोड असल्याचे निदान केले आणि माझ्या पायाखालील जमीन हलली. खूप दिवस उपचार केले पण काही फरक नाही. शेवटी डॉक्टरांनी स्पष्ट सांगितले काही फरक होणार नाही. आणि येथून माझा जीवन गाडा बदलला. घरातील आपुलकीने वागणारी माणसे थोडी नाही चांगलीच बदलली. एक तिरस्काराची वागणूक सुरु झाली. माझा हाताचा स्वयंपाक खाणे टाळू लागली. नवराही खूप बदलला. उठता बसता काय ही कर्माची फळे ? अशी टोमणी सुरु झाली.

नंतर शाब्दिक चकमकी आणि कधी कधी मारझोड, नंतर दारू पिऊनही धिंगाणा होवू लागला. हे सर्व सांगत असताना तिच्या डोळ्यांतून अश्रूंच्या धारा सुरु झाल्या होत्या. माहेरी बरेच दिवस गेले. तर माहेरीही हीच कटकट. लहान बहिणीचे लग्न जमायाचेय. आणि ही अवदसा घरात अाली कसे होणार ....?

कधी कधी वाटायचे जीव द्यावा. दोन तीन वेळा प्रयत्नही केला. पण अपयश आले.

नवरा डागांमुळे माझ्याकडे लक्ष्य देईना. त्याचे बाहेर अफेअर चालू झाले. मी तेही स्वीकारले. आत्ता प्रकरण खूप पुढे गेलंय. गेल्या ५ वर्षांपासून कोर्टात केस चालू होती. नंतर घटस्पोट झाला. मागील महिन्यात निकाल लागला. दोन्ही मुली नवरयाकडे राहतात. मी एकटी सध्या आई वडिलांकडे राहते. माझ्या टेन्शनमुळे वडीलही दारू पिऊ लागले. त्यांना दोनदा हृद्य विकाराचा त्रास झाला.

अाता तुम्हीच सांगा डॉक्टर परमेश्वराने काय बाकी ठेवलय? कोणता त्रास देण्याचे बाकी राहिलं? मी असा काय गुन्हा केलाय कि पांढरे डाग माझ्याच वाट्याला आले ? आणि माझा पूर्ण संसार उद्वस्त झाला?

सांगा.

तपासणी केल्यानंतर उपचार सुरू केले. पण या आजाराने तिच्या आयुष्यात जी उलथापालथ झाली, ती ऐकून मीही निरुत्तर झालो.

डॉ. संजय सोनवणे यांच्याशी संपर्कासाठी - 

2) पत्ता - आनंद हॉस्पिटल अँड रिसर्च सेंटर, घोडेगाव, ता. नेवासे, जि. अहमदनगर
3) फोन नं. 98 22 287 376 / 97 62 378 492

दीड तासाच्या प्रयत्नांनंतर युवक सुखरुप विहिरीबाहेर

नेवासे । DNA Live24 - तालुक्यातील घोडेगाव शिवारात नगर-औरंगाबाद हायवेजवळ चंद्रभान सोनवने यांच्या शेतातील विहिरीत एका युवकाने उडी मारली. हा प्रकार सायंकाळी सात वाजेच्या सुमारास घडला. या घटनेची माहिती मिळताच सोनई पोलिस ठाण्याचे सहायक पोलिस निरीक्षक किरण शिंदे, सहकारी आणि घोडेगाव ग्रामस्थांनी या युवकाला दीड तासाच्या अथक प्रयत्नांनंतर यशस्वीरित्या बाहेर काढले. पैशांचा तगादा चुकवण्यासाठी त्याने घोडेगावात येऊन विहिरीत उडी मारली. पण, पोलिस व ग्रामस्थांच्या सतर्कतेमुळे त्याचा जीव वाचला. (आम्हाला Facebook पेज व Twitter वर फॉलो करा)

विहिरीबाहेर काढलेला युवक - छाया - किशोर प्रधान
नेमकं काय झालं ? - दीपक ज्ञानेश्वर लबडे (वय 20, रा. श्रीरामपूर) असे युवकाचे नाव आहे. दीपक एका फायनान्स कंपनीत कामाला आहे. मंगळवारी सायंकाळी सहा वाजेच्या सुमारास तो होंडा शाईन मोटारसायकलवर घोडेगाव चौफुल्यावर आला. त्याच्यासोबत राहुरी येथील दोन युवक होते. बराच वेळ ते या परिसरात फिरत होते.

तेथून दीपक एकटाच मोटारसायकलवर औरंगाबादच्या दिशेने गेला. तासभर होऊनही तो न परतल्याने इतर दोघांनी त्याचा शोध घ्यायला सुरुवात केली. काही वेळाने त्यांना दीपकने एका विहिरीत उडी घेतल्याचे समजले. गावातील लोकांनाही ही वार्ता समजली. घोडेगाव सोसायटीचे संचालक बालु पाटील सोनवणे यांनी ही बाब चौकात बंंदोबस्ताला असलेले सोनईचे एपीआय किरण शिंदे यांना सांगितली. (आम्हाला Facebook पेज व Twitter वर फॉलो करा)

हे अाले धावून - एपीआय किरण शिंदे यांनी तत्काळ पोलिस कॉन्स्टेबल काका मोरे, बाबा वाघमोडे, गणेश धोत्रे, शिवाजी माने या सहकाऱ्यांसह घटनास्थळी धाव घेतली. यावेळी बालू पाटील सोनवणे, लखन भोसले, किशोर प्रधान, नवनाथ भोसले, सर्जेराव सोनवणे, राम सोनवणे, संकेत ठोंबळ, बाळासाहेब ठोंबळ, जालु सोनवणे, संतोष पुंड, प्रदिप भगत, आदिनाथ सोनवणे, संदिप बनसोडे, दिलीप शहाराव, हेही मदतीला धावून आले..

अंधार असल्याने विहिरीत काहीच दिसत नव्हते. जमलेल्या ग्रामस्थ व पोलिसांनी विहिरीत टॉर्चच्या साह्याने डोकावले असता दीपक पाण्यात तरंगत एका कडेला लटकल्याचे दिसले. सुरुवातीला मोठा दोरखंड सोडला. पण दीपक त्याच्या साह्याने वर येत नव्हता. त्यामुळे आणखी दोरखंड व एक विणलेली बाज आणण्यात आली. ही बाज दोरखंडाच्या साह्याने पुन्हा त्या विहिरीत सोडण्यात आली.

 आम्हाला Facebook पेज व Twitter वर फॉलो करा)

बाजेवर बसवून युवकाला बाहेर काढले.  छाया - किशोर प्रधान.
हे होतं कारण - विहिरीत सोडलेल्या बाजेवर दीपक बसल्यानंतर मोठ्या मुश्किलीने त्याला वर काढण्यात आले. पाण्यात पडून गारठल्यानं त्याला शेकोटी पेटवून ऊब देण्यात आली. पोलिसांच्या चौकशीत दीपक सुरुवातीला उडवाउडवीची उत्तरे देत होता. नंतर मात्र पैशांच्या व्यवहारातुन हा प्रकार घडल्याचे निष्पन्न झाले. पैशांचा तगादा चुकवण्यासाठी तो इकडे पळून आला होता. त्यातूनच त्याने हे कृत्य केले.

पोलिसांनी दीपकच्या पालकांसोबत संपर्क साधून त्यांना घोडेगावात पाचारण केले. त्यावेळी हा प्रकार आपल्या घरच्यांना सांगू नका, अशी गयावया तो करू लागला. रात्री अकरा वाजेच्या सुमारास त्याचे वडील ज्ञानेश्वर लबडे घोडेगावात आले. त्यांचीही चौकशी करण्यात आली. याप्रकरणी सोनई पोलिस स्टेशन डायरिला नोंद घेऊन व  समज देऊन  दिपकला पालकांच्या ताब्यात सोपवण्यात आले. (आम्हाला Facebook पेज व Twitter वर फॉलो करा)

 API किरण शिंदे
घोडेगावकरांचे आभार - घोडेगावचे लोक चांगले आहेत. अडीअडचणीत कोणीही कोणाच्या मदतीला शक्यतो धावून येत नाही. त्यात पोलिसांचे काही प्रकरण असेल, तर चार हात लांबच बरे, अशी मानसिकता असते. मात्र घोडेगाव ग्रामस्थ सदैव मदतीला तत्पर असतात. त्यांच्या मदतीमुळे व प्रसंगावधानामुळेच आज या युवकाचे प्राण वाचवू शकलाे. - किरण शिंदे, सहायक पोलिस निरीक्षक, सोनई पोलिस स्टेशन.

(आम्हाला Facebook पेज व Twitter वर फॉलो करा) 

सोशल मिशनसाठी एकत्र आलेली एनसीसी सोशल फ्रंट. छायाचित्र साैजन्य : नगरी सातारकर
शेवगाव । DNA Live24 - (नगरी सातारकर)- आपल्या आजूबाजूला असलेल्या अनेक चुकीच्या गोष्टी आपणास खटकतात. त्यासाठी  सरकार, शासनासह समाजातील इतर घटकांना आपण दोष देत बसतो. परंतु, यामध्ये वेळ वाया घालवण्यापेक्षा हे चुकीचे दुरुस्त करण्यासाठी आपण काय करतोय हे महत्वाचे. अशाप्रकारे आत्मपरीक्षण करून आपल्या सुनिश्चित सोशल मिशनच्या पूर्तीसाठीची मुहूतमेढ शेवगाव येथील न्यू आर्ट्स महाविद्यालयातील एनसीसीच्या माजी छात्रसैनिकांच्या एनसीसी सोल्जर फ्रंट ने नुकतीच रोवलीय.

२२ जानेवारीला होणाऱ्या स्नेहमेळाव्यानंतर आपल्या सोशल मिशनच्या दिशेने हे छात्र दमदार पाऊल टाकणार आहेत. यानिमित्त माजी छात्रांची एकत्र येण्याची संकल्पना आणि त्याला येणाऱ्या मूर्त स्वरूपाचा घेतलेला हा अनोखा लेखाजोखा. 

अहमदनगर जिल्ह्यातील शेवगाव येथील न्यू आर्ट्स, कॉमर्स अँड सायन्स महाविद्यालयातील एनसीसीचे  माजी छात्रसैनिक व नाशिक येथील सकाळचे वरिष्ठ पत्रकार ऍड. उमेश अनपट आणि औरंगाबाद उच्चं न्यायालयातील ऍड. संदीप आंधळे यांनी सर्व माजी एनसीसी छात्राना प्रथम एकत्र आणण्याचे ठरवले. त्यानुसार प्रथम व्हाट्सअपर एनसीसी सोशल फॉरम हा ग्रुप बनवण्यात आला. त्यामध्ये सुरुवातीला काही जणांना ऍड करून या मागील सोशल मिशन चा उद्देश विशद करण्यात आला. 

आपण एनसीसीमधील मित्र एकत्र येऊ या विचारानेच सर्व आनंदून गेले. आनंद वर्षांपासून दूर असणारे मित्र प्रथमच एकमेकांशी संवाद साधू लागले. ग्रुप मधील दाखल मित्रांच्या गुरुपामुळे सर्वाना एकत्र आणण्याच्या संकल्पनेस आणखी बळ मिळाले. यानंतर सहा महिन्याच्या कालावधीनंतर दिवाळीनंतर पाडव्याला उमेश अनपट आणि ठाणे पॉलिसमध्ये कार्यरत गणेश देशमूख यांनी शेवगाव येथील एनसीसी युनिटचे सर्वेसर्वा ऑनररी मेजर जी.एम. चोथे यांच्याशी या संकल्पनेविषयी चर्चा केली. त्यांना ती खूपच भावली. 

या नंतर काही दिवसांनी श्री. चोथे सर यांच्या घरी मारुती फरताळे, अरुण चोथे, किरण कानडे, वसंत देशमुख यांची पुढील मार्गक्रमणासाठी बैठक झाली. यानंतर आठवडाभरात श्री. चोथे सर व श्री. अनपट यांनी न्यू आर्ट्सचे प्राचार्य डॉ. लक्ष्मण मतकर यांना या विषयी सांगितले. याचे कौतुक करत त्यासाठी सर्वतोपरी मदत करण्याची तयारी दर्शवली. गुरुजनांनी दिलेल्या पाठिंब्यानंतर या संकल्पनेस मूर्त स्वरूप येण्याच्या दृष्टीने हालचालींना वेग आला. या बैठकीची माहिती ग्रुपवर टाकल्यानंतर सर्वांना उधाण आले. 

तोपर्यंत अवघे २० ते २५ जण या ग्रुप मध्ये ऍड झालेले होते. या नंतर अवघ्या चार दिवसांमध्ये ग्रुपची संख्या सत्तरवर पोहचली. ज्याला मिळेल त्या माजी मित्राचा नंबर प्रत्येकजण ऍड करतोय. आता हा करावा शंभरीवर पोहचलाय. एवढ्या मोठ्या स्वरूपात ग्रुपची ताकद एकत्र आल्यानंतर २३ डिसेंबर रोजी चोथे सर यांच्या मार्गदर्शनाखाली आणि मतकर सर यांच्या मार्गदर्शनाखाली व एएनओ बापूसाहेब फुंदे सर यांच्या उपस्थितीत न्यू आर्ट्स महाविद्यालयात २२ जानेवारीला होणाऱ्या स्नेहमेळाव्याच्या नियोजनासाठी बैठक घेण्यात आली. 

बैठकीस राष्ट्रवादी युवक जिल्हा संघटनेचे जिल्हाध्यक्ष संजय कोळगे, सकाळचे पत्रकार ऍड. उमेश अनपट, ऍड. संदीप आंधळे, प्राचार्य संदीप घुगे, सोने व्यावसायिक अतुल दहिवाळकर, बांधकाम व्यावसायिक संदीप गोबरे, पंचायत समिती क्लार्क मारुती फरताळे, सीआरपीएफचे सैनिक प्रकाश भुसे, सोलर व्यावसायिक किरण कानडे, ऍड. उद्धव चेमते, प्रा. भारत धनावडे, व्यावसायिक रमेश चव्हाण, प्राचार्य अरुण चोथे, प्रा. वसंत देशमुख, पोलीस हवालदार नवनाथ बर्डे, ऍड. रवींद्र पवार हे माजी छात्रसैनिक उपस्थित होते. 

बैठकीतल्या चर्चेला अनेक रंग होते. महाविद्यालयातील हळवे करणाऱ्या अनुभवांवर बोलताना भावनिकतेतून सुरुवात झाली. सोशल मिशनच्या मार्गावर वाटचाल करण्यासाठी एकजूट होण्याच्या खंबीरपणे घेतलेल्या निर्णयानंतर चर्चेने पूर्णविराम घेतला. अनेक विषयांचा उहापोह करण्यात आला. २२ जानेवारीला स्नेहमेळावा घेण्याचे ठरले. प्रामुख्याने ज्या एनसीसीने आपल्याला घडवले, वाढवले, मोठे केले अश्या या येथील एनसीसीच्या युनिटमागे खंबीरपणे उभे राहण्याचा एकमुखी निर्णय घेण्यात आला. 

एनसीसी आणि त्याचबरोबर आपल्या आजूबाजूला असणाऱ्या प्रश्नांची सोडवणूक करण्यासाठी आपण तन, मन, धनाने एकत्र येऊन काम करण्याची ग्वाही प्रातिनिधिक स्वरूपात उपस्थित सर्व छात्रांनी दिली. यानंतर या सोशल मोहिमेच्या उद्दीष्ठपुर्तीसाठी एकत्र आलेल्या छात्रसैनिकांच्या संस्थेला समर्पक नाव देण्याच्या दृष्टीने चर्चा झाली. त्यासाठी झालेल्या प्रदीर्घ मंथनानंतर एनसीसी सोल्जर फ्रंटचा जन्म झाला.

आता अद्भुत स्नेहभेट -येत्या २२ जानेवारीला न्यू आर्टस् महाविद्यालयाच्या यशस्वी वाटचालीचे प्रतीक असलेल्या येथील भव्यदिव्य नूतन इमारत, भव्य सभागृह आदीचे उदघाटन उपकुलगुरूंसह विविध मान्यवरांच्या हस्ते होणार आहे. याच सुवर्ण दिवसाचे औचित्य साधून एनसीसीच्या माजी छात्रसैनिकांच्या अद्भुत, अनोख्या मेळाव्याचे आयोजन करण्यात आले आहे. आपल्या जबाबदारीच्या गर्तेत अडकलेले छात्रसैनिक पुन्हा एकदा आपल्या महाविद्यालयाच्या आपुलकी, स्नेहाच्या छत्राखाली काहीकाळ विसावणार आहेत. आता ओढ लागलीय ती या दिवसाची, भेटीची. 


अहमदनगर । DNA Live24 - समाजातील विविध उपक्रमांना नेहमीच साथ देणाऱ्या, पण त्याच बरोबर शहरातील सामाजिक, संस्कृती व कला क्षेत्रात उल्लेखनीय कार्य करणार्यांना आर्थिक पाठबळ देण्याचे रामावतार मोहनलाल मानधना ट्रस्टचे कार्य कौतुकास्पद आहे, असे मत जिल्हाध्यक्ष विठ्ठलदास आसावा यांनी व्यक्त केले. ाआपल्या गायनाने देशभरात नगरचे नाव उज्वल करणाऱ्या अंजली व नंदिनी गायकवाड या भगिनी नगर शहराचे सांस्कृतीक वैभव असल्याचे देखील ते यावेळी म्हणाले.

मानधना फार्म येथे अहमदनगर जिल्हा माहेश्वरी सभा आयोजित जिल्हास्तरीय बैठकीत सारेगमपा विजेती लिटील चँम्प अंजली गायकवाड हिचा जिल्हा  माहेश्वरी सभा व रामावतार मोहनलाल मानधना ट्रस्टतर्फे सन्मान करण्यात आला. यावेळी माहेश्वरी समाजाच्या वतीने जिल्हाध्यक्ष आसावा यानी रोख स्वरूपात व मानधना ट्रस्टतर्फे अंजलीला शैक्षणिक  मदतीचा  धनादेश सानिया पराग मानधना हिच्या हस्ते देण्यात आला. तसेच तिची बहीण नंदिनी व मातापित्यांचा सत्कार करण्यात आला.

यावेळी माहेश्वरी सभेचे सचिव अजय जाजू, सहसचिव रामचंद्र राठी, मोहनलाल मानधना, पराग मानधना, डॉ.ज्योति दीपक, डॉ. किरण व डॉ. वैशाली तसेच जिल्हातून आलेले तालुकाध्यक्ष, पदाधिकारी, नगरमधील मान्यवर उपस्थित होते. मानधना परिवारातर्फे उपस्थित पदाधिकारी व मान्यवरांचे स्वागत करण्यात आले. यावेळी अंजली व नंदिनी यांनी गाणी सादर करून उपस्थितांची मने जिकून घेतली. पराग मानधना यांनी सर्वांचे आभार मानले.


अहमदनगर । DNA Live24 - कारागृहातील सर्वच बंदीजन आधीपासून गुन्हेगारी वृत्तीचे नसतात. आणि बंदीजनांचा सर्व मुलभूत सुविधा मिळविण्याचा हक्क अबाधीत असतो. मात्र ते मायेच्या उबेपासून वंचित असतात. हीच गरज ओळखून आज ब्लँकेट वाटप करण्यात आले असून, त्यातून समाजबांधवांत मायेचा पूल बांधला जाईल, अशी अपेक्षा रोटरी क्लबचे अध्यक्ष दादासाहेब करंजुले यांनी व्यक्त केली.

रोटरी क्लब व मानकन्हैय्या ट्रस्ट या दोन्हीही संस्था सामाजिक क्षेत्रात कार्य करणाऱ्या अग्रगण्य संस्था आहेत. कारागृहातील बंदीजन हे परिस्थितीने आज या ठिकाणी आले आहेत. यापुढील काळात ते समाजात एक सुज्ञ नागरिक म्हणून वावरतील. ब्लँकेटचे वाटप करुन त्यांना मायेची उब देण्यात आली आहे, असेही करंजुले यावेळी म्हणाले.

जिल्हा कारागृहामध्ये रोटरी क्लब व मानकन्हैय्या ट्रस्ट यांच्या संयुक्त विद्यमाने कारागृहातील ज्येष्ठ बंदीजणांसाठी ५० नग ब्लँकेटस् वाटप करण्यात आले. या कार्यक्रमाच्या करंजुले व डॉ. सुधा कांकरिया उपस्थित होत्या. डॉ. सुधा कांकरिया म्हणाल्या, सध्याच्या थंडीच्या दिवसात बंदीजणांना रोटरी क्लब व कांकरिया ट्रस्टच्या वतीने ब्लॅकेटचे वाटप करुन सामाजिक जाणिव जागृत ठेवली आहे.

नियमित व्यायाम, योगा आणि आधात्मिक साधनेतून आपल्यातील अवगुण हे दूर होत असतात, त्यासाठी नित्य नियमाने या गोष्टी केल्या पाहिजे. आज कारागृहात अनेक वृद्ध दिसतात अनावधानाने घडलेल्या घटनांमुळे त्यांना येथे यावे लागले. मात्र त्यांनी हाताश न होता कारागृह हे चिंतनगृह आहे, असे समजून  हा काळ म्हणजे आपला आत्मशुद्धीचा काळ आहे असे सांगितले.

वरिष्ठ तुरंग अधिकारी शामकांत शेडगे यांनी प्रास्तविक केले. ते म्हणाले, गेल्या काही काळापासून समाजातील अनेक सेवाभावी संस्था या कारागृहात येवून निरनिराळे उपक्रम राबवतात. त्यामुळे बंदी बांधवांना मोठा मानसिक आधार मिळतो. कारागृह अधिक्षक नागनाथ सावंत यांनी आभार मानले.

या कार्यक्रमास रोटरीचे निलेश वैकर, संजय नावंदर, अमित खर्डे, भरत लोखंडे, मंगेश दरवडे, प्रशांत बोगावत, प्रिया सोनटक्के तसेच कारागृहाचे वैद्यकीय अधिकारी डॉ. संजय खंडागळे, तुरुंग अधिकारी तानाजी धोत्रे, देविका बेडवाल व कर्मचारी उपस्थित होते.


अहमदनगर । DNA Live24 - महाराष्ट्र राज्य शिक्षक परिषदेच्या शिष्टमंडळाची विविध शैक्षणिक मागण्याबाबत शालेय शिक्षण मंत्री विनोद तावडे यांच्याशी सकारात्मक चर्चा झाली. मात्र शिक्षकांच्या प्रलंबित मागण्या पुर्ण होण्यासाठी नागपुर येथील हिवाळी अधिवेशन काळात १३, १४ व १५ डिसेंबरला महाधरणे आंदोलनास संघटना ठाम आहे. या आंदोलनात मोठ्या संख्येने जिल्ह्यातील शिक्षकांनी सहभागी व्हावे, असे आवाहन जिल्हाध्यक्ष बाबासाहेब बोडखे यांनी केले आहे.

शिक्षक परिषदेचे कार्याध्यक्ष अामदार नागो गाणार व राज्याध्यक्ष वेणूनाथ कडू यांच्या नेतृत्वाखाली शिक्षक परिषदेचे शिष्टमंडळाने शालेय शिक्षणमंत्री विनोद तावडे यांची भेट घेवून शिक्षकांच्या प्रलंबित प्रश्‍नांवर चर्चा केली. आठ दिवसात सकारात्मक पाऊल उचलण्याचे आश्‍वासन शिक्षणमंत्री तावडे यांनी दिले. तसेच महाधरणे आंदोलनाच्या पार्‍वभुमीवर शिक्षक परिषदेची राज्य कार्यकारणी बैठक पुणे येथे झाली.

१ व २ जुलैला घोषित शाळा व तुकड्यांना अनुदान मिळणे. जुनी पेंन्शन योजना लागू करणे. चुकीचे संच निर्धारण व समायोजन, अतिरिक्त शिक्षकांचे वेतन, १६२८ शाळांना पुढील टप्पा अनुदान मिळणे, यासोबतच अदिवासी विकास व समाज कल्याण आश्रम शाळांतील शिक्षकांच्या प्रश्‍न सोडविण्याबाबत चर्चा करण्यात आली. महा राज्यव्यापी धरणे आंदोलनात सहभागी होवून, हक्काच्या मागण्या मान्य करुन घेण्यासाठी आंदोलन यशस्वी करु, असे जिल्हाध्यक्ष बोडखे म्हणाले.

हे आंदोलन यशस्वी करण्यासाठी संघटनेचे सरकार्यवाह नरेंद्र वातकर, विभागीय कार्यवाह रमेश चांदुरकर, राज्य कार्यवाह सदस्य राजेंद्र गुजरे, विभागीय अध्यक्ष जे. के. शर्मा, विभागीय कोषाध्यक्ष राजेंद्र वडनेरकर, कार्यालय मंत्री गंगाधर टप्पे, नाशिक विभाग अध्यक्ष सुनिल पंडीत प्रयत्नशील आहेत.

पॅनकार्ड क्लब गुंतवणुकदारांची महत्वाची बैठक

अहमदनगर । DNA Live24 - पॅनकार्ड क्लब कंपनीच्या गुंतवणुकदारांचे पैसे परत करण्यासाठी सेबीकडून दिरंगाई होत आहे. त्यामुळे गुंतवणुकदारांनी आपले अर्ज भरुन सेबीच्या मुख्य कार्यालयावर निघणाऱ्या मोर्चात मोठ्या संख्येने सहभागी व्हावे, असे आवाहन बँक कामगार नेते विश्‍वास उटगी यांनी केले. काटवन खंडोबा रोडवरील सप्तपदी मंगल कार्यालयात झालेल्या गुंतवणुकदारांच्या बैठकीत ते बोलत होते.

याप्रसंगी मुंबईचे सेवानिवृत्त सहाय्यक पोलिस आयुक्त अशोक गोरे, अध्यक्ष अरविंद पेडणेकर, राजू देसले, सचिव विशाल बर्डे, खजिनदार विजय गोसावी, नगर प्रतिनिधी मोहन आकुबत्तीन, लक्ष्मण गुरप, संतोष सोनटक्के, राजेश आकुबत्तीन आदिंसह जिल्ह्यातील गुंतवणुकदार मोठ्या संख्येने उपस्थित होते.

पॅनकार्ड क्लब लिमिटेड कंपनीत देशभरातून लाखो जणांनी गुंतवणुक केली आहे. सेबीने पॅनकार्ड क्लबला नोटीस पाठवून गुंतवणूक घेण्यास प्रतिबंध करुन गुंतवणुकीची रक्कम गुंतवणूकदारांना परत करण्यास सांगितले. मात्र पॅनकार्ड क्लब कंपनीने गुंतवणूकदारांची रक्कम परत केली नाही. न्यायालयाने सेबीला मालमत्ता विक्री करुन गुंतवणुकदारांचे पैसे अदा करण्याचे आदेश दिले. मात्र सेबीकडून मालमत्तेचा कुठलाही लिलाव झालेला नसून गुंतवणुकदारांचे पैसे परत करण्यासाठी दिरंगाई होत आहे.

देशात जवळपास ५१ लाख व महाराष्ट्रात २७ लाख गुंतवणुकदार आहेत, अशी माहिती विशाल बर्डे यांनी दिली. यावेळी मुंबईचे सेवानिवृत्त सहाय्यक पोलिस आयुक्त अशोक गोरे यांनी इन्व्हेस्टर अ‍ॅक्शन फोरम चॅरिटेबल ट्रस्ट  या गुंतवणुकदारांच्या संघटनेच्या माध्यमातून भारतभर सभा घेऊन गुंतवणुकदारांची चळवळी सुरु केल्याचे सांगून कायदेशीर लढ्याबाबत मार्गदर्शन केले.

अध्यक्ष अरविंद पेडणेकर यांनी सर्व गुंणवणुकादारांची विराट निवेदन रॅली लवकरच सेबीच्या मुंबई ऑफिसवर निघणार आहे, ज्याद्वारे आम्ही गुंतवणुकादार सेबीला विनंती करणार आहोत, कि आमचे पैसे लवकरच लवकर परत द्यावेत असे सांगितले. तसेच यासाठी सर्व गुंतवणुकदारांनी या लढ्यात सामिल होण्याचे आवाहन केले.

मोहन आकुबत्तीन म्हणाले, नगरमधील सर्व गुंतवणुकदारांच्या वेळोवेळी बैठका झाल्या आहेत. या बैठकीत देशपातळीवर नेतृत्व करत असलेल्या मान्यवरांनी आपली भुमिका मांडली. त्या भुमिकेस नगरमधील प्रतिनिधी व गुंतवणुकदारांनी पाठिंबा देऊन मुंबई येथील सेबीच्या मुख्य कार्यालयावर निघणाऱ्या मोर्चात सहभागी होण्याचे आवाहन केले.


नगर : DNA Live 24-
थिंक ग्लोबल फौंडेशनचा दुसरा “स्व. सदाशिव अमरापूरकर गौरव पुरस्कार (२०१७)” सुप्रसिद्ध पार्श्वगायक सुरेश वाडकर यांना जाहीर झाला असल्याची घोषणा फौंडेशनचे अध्यक्ष किरण काळे यांनी पत्रकार परिषदेत आज केली.

वाडकर यांनी आजवर हिंदी सिने संगीत, मराठी चित्रपट संगीत, भावसंगीत, भक्ती संगीत तसेच हिंदुस्तानी शास्रीय संगीतात दिलेल्या अतुलनीय योगदानासाठी त्यांची पुरस्कार्थी म्हणून निवड करण्यात आली आहे. रोख रुपये ५१०००, सन्मान चिन्ह, मानपत्र असे  पुरस्काराचे स्वरूप आहे. जेष्ठ दिवंगत अभिनेते सदाशिव अमरापूरकर यांचे ३ नोव्हेंबर २०१४ रोजी अकाली निधन झाले होते. त्यांच्या पुण्यतिथीचे औचित्य साधून आज पुरस्काराची घोषणा करण्यात आली.  पत्रकार परिषदेस शिल्पकार प्रमोद कांबळे, सीए राजेंद्र काळे, गायक पवन नाईक, मनपाचे माजी शहर अभियंता एन. डी. कुलकर्णी, चित्रपट निर्माते श्रीपाद दगडे, फौंडेशनचे पदाधिकारी स्वप्निल पाठक आदी यावेळी उपस्थित होते.

स्व. अमरापूरकर हे नगरचे भूषण होते. त्यांनी आपल्या सशक्त अभिनयाच्या जोरावर हिंदी व मराठी नाट्य, चित्रपट क्षेत्रात आपले अढळ स्थान निर्माण केले. त्यांचे नाव व कार्य कायम स्मरणात राहावे व त्यांच्या नावे दिल्या जाणाऱ्या पुरस्काराच्या माध्यमातून विविध क्षेत्रात उल्लेखनीय कामगिरी करणाऱ्या व्यक्ती – संस्था यांच्या कार्याचा गौरव करून त्यांना सन्मानित करावे, याहेतूने मागील वर्षापासून हा पुरस्कार सुरु करण्यात आला आहे.

७ ऑगस्ट १९५५ ला जन्म झालेल्या वाडकरांचे कोल्हापूर जिल्ह्यातील चिखली हे मूळ गाव. मुंबईतील गिरणी कामगाराचा मुलगा ते लोकप्रिय गायक असा वाडकरांचा प्रवास थक्क करणारा आहे. १९७६ च्या सूर सिंगार या त्यावेळच्या गाजलेल्या स्पर्धेतून विजेता ठरलेल्या वाडकरांचा सुरेल आवाज आणि तयार गळा पहिल्यांदा रसिकांना ऐकायला मिळाला. संगीतकार रवींद्र जैन हे त्या स्पर्धेचे परीक्षक होते. जैन यांनी आपल्या पहेली (१९७७) या हिंदी चित्रपटातून त्यांना पहिल्यांदा लॉंच केले. त्यानंतर  वाडकरांनी  कधी मागे वळून पाहिले नाही.

जेव्हा भारतरत्न लता मंगेशकर यांनी वाडकरांना पहिल्यांदा ऐकले तेव्हा त्या या मराठमोळ्या गायकाच्या गॉडफादर म्हणून त्यांच्या पाठीशी उभ्या राहिल्या. लक्ष्मिकांत-प्यारेलाल, खय्याम, कल्याणजी-आनंदजी अशा त्या वेळच्या अनेक दिग्गज संगीतकारांना स्वतः फोन करून वाडकरांना ब्रेक देण्यासाठी लता दिदींनी शिफारस केली.

गायक मुकेश यांच्या निधना नंतर राज कपूर यांनी ‘सुरेश हाच आता माझा मुकेश आहे आणि हाच आता आरके बॅनरच्या नायकांसाठी पार्श्वगायन करेल’ असे जाहीर केले. झालेली तसेच. आरके बॅनरच्या प्रेमरोग, हीना, प्रेमग्रंथ, राम तेरी गंगा मैली, बोल राधा बोल अशा त्यावेळी बॉक्स ऑफिसवर गाजलेल्या अनेक चित्रपटांसाठी वाडकरांनी गाणी गायली. ऋषी कपूर, राजीव कपूर, अनिल कपूर, अमीर खान, कमल हसन, जॅकी श्रॉफ, मनोज वाजपेयी अशा अनेक आघाडीच्या नायकांना त्यांनी आवाज दिला.

ए.आर. रेहमान, आर.डी. बर्मन, शिव-हरी,  बप्पी लहरी, अन्नू मलिक, विशाल भारद्वाज या हिंदीतील मोठ्या संगीतकारांबरोबर काम केलेल्या वाडकरांनी मराठीतील पं. हृदयनाथ मंगेशकर, श्रीनिवास खळे, सुधीर फडके, वसंत देसाई, अशोक पत्की, अनिल-अरुण यांच्या बरोबर देखील खूप काम केले आहे. लता मंगेशकर, आशा भोसले यांच्या बरोबर गायलेली त्यांची अनेक युगुल गीते लोकप्रिय आहेत.

लवकरच नगर शहरात भव्य पुरस्कार सोहळ्याचे आयोजन करून मान्यवरांच्या उपस्थितीत सुरेश वाडकर यांना पुरस्कार प्रदान करण्यात येणार असल्याचे, अध्यक्ष किरण काळे यांनी यावेळी बोलताना सांगितले.

पद्म पुरस्कार देण्याची मागणी :
वाडकरांना आजवर मदन मोहन पुरस्कार (१९७६), मध्यप्रदेश सरकारचा लता मंगेशकर पुरस्कार (२००४), महाराष्ट्र सरकारचा महाराष्ट्र प्राईड अॅवार्ड  (२००७), ‘मी सिंधुताई सपकाळ’ चित्रपटासाठी उत्कृष्ट पार्श्वगायकाच्या नॅशनल फिल्म अॅवार्डने (२०११) त्यांना आजवर सन्मानित करण्यात आले आहे.
परंतु वाडकरांचे सांगीतिक योगदान एवढे दैदिप्यमान असूनही त्यांना पद्मविभूषण, पद्मश्री या पुरस्कारांनी भारत सरकारने आजवर सन्मानित केले नाही, याची खंत वाटत असल्याचे यावेळी काळे म्हणाले. पद्म पुरस्कारासाठी महाराष्ट्र शासनाने वाडकरांच्या नावाची शिफारस भारत सरकारकडे करावी अशी मागणी मुख्यमंत्री देवेंद्र फडणवीस, सांस्कृतिक कार्यमंत्री विनोद तावडे यांच्याकडे लवकरच करणार असल्याचे यावेळी काळे यांनी सांगितले.


मुंबई । DNA Live24 - (व्हिडिओ खाली दिलेला आहे)

नवोदित दिग्दर्शक महेश रावसाहेब काळे दिग्दर्शित 'घुमा' हा सिनेमा इंग्रजी शिक्षणाची कास धरू पाहणाऱ्या व आपल्या हुशार मुलाला इंग्रजी शाळेत पाठवू इच्छिणाऱ्या बापाच्या संघर्षाची कथा आहे. पण या सिनेमाच्या आशयामुळे ती एका व्यक्तीची कहाणी न उरता वैश्विक गोष्ट बनते.  उत्तम कार्यवाहीद्वारे, मनाला भिडणाऱ्या आणि एरव्ही डोळेझाक करणाऱ्या विषयाला मुख्य वाटेवर आणून त्यावर भाष्य करणारे चित्रपट कमी असतात. त्यात 'घुमा'चा समावेश होतो. 

(आम्हाला Facebook व Twitter वर फॉलो करा)

मुख्य भूमिकेत शरद जाधव, तर अन्य भूमिकेत पूनम पाटील, आदेश आवारे व अन्य कलावंतांनी, तर योगेश कोळी यांची छायाचित्रणासाठी व अपूर्वा साठे यांची संकलनाद्वारे उत्तम साथ दिली आहे. महेश काळे यांच्या रुपात मराठीला एका तरुण व उत्तम दिग्दर्शक मिळाला आहे. मराठीला जागतिक चित्रपटांच्या श्रेणीत नेण्याची अपेक्षा त्यांच्याकडून बाळगायला हरकत नाही.

या सिनेमाला 'डीएनए लाईव्ह२४ डॉट कॉम' देत आहेत ४ स्टार. घुमा सिनेमाचा रिव्ह्यु नेमका कसा आहे, हे जाणून घेण्यासाठी सिनेस्थेशिया टीमचे सिने समीक्षक अविनाश पालकर व विराज मुनोत यांच्या टीमचा पुढील व्हिडिओ प्ले करा...


(आम्हाला Facebook व Twitter वर फॉलो करा)


मुंबई । DNA Live24 - ग्रामविकास मंत्री पंकजा मुंडे आणि भगवान गडाचे महंत नामदेव शास्त्री यांच्या समर्थकांमधील वाद यंदाही विकोपाला गेलेला असतांना पंकजा मुंडे यांनी स्वतः पुढाकार घेत महंत शास्त्री यांना भावनिक साद घातली आहे. "मी आतापर्यंत कोणासमोर झुकले नाही. मात्र समाजासाठी नतमस्तक होते. मला दिवाळीला माहेरची भेट द्या" असे म्हणत त्यांनी महंतांना पत्र पाठविले आहे. आता या पत्रावर महंत काय भूमिका घेणार? याकडे सर्वांचे लक्ष लागले आहे.

भगवानगड दसरा मेळाव्याच्या वाद यंदाही कायम आहे. यानिमित्ताने ग्रामविकास मंत्री पंकजा मुंडे आणि गडाचे मठाधिपती महंत नामदेव शास्त्री आमनेसामने आले आहेत. अशा प्रसंगी या पत्राचे महत्व वाढले आहे.

आज आपल्याकडे आपली लेक एक पहिली आणि शेवटची विनंती करते. लोकांची तळमळ पाहून कोणी मध्यस्थी नको म्हणून मीच विनंती करते, शेवटी मी लहानच आहे. मी लहान होते, तुम्ही मोठे व्हा. काही नको त्यांना फक्त 20 मिनिटं वेळ वर्षातून द्या. ते पुन्हा कोयता घेऊन राबायला जातील, त्यांना ऊर्जा मिळते. मी आतापर्यंत कोणापुढे झुकले नाही, मात्र समाजासाठी नतमस्तक होते. मला दिवाळीची माहेरची भेट द्या, असं पंकजा मुंडे यांनी पत्रात लिहिलं आहे.

पंकजा मुंडे यांचं पत्र जसेच्या तसे

तसं आपल्यात काय झालं या प्रश्नाचे उत्तर माझ्याकडेही नाही. पण आज आपल्याकडे आपली लेक एक पहिली आणि शेवटची विनंती करते आहे आणि लोकांची तळमळ बघून मी ठरवलं, कोणी मध्ये नको, मीच विनंती करते. शेवटी मी लहानच आहे. वारणीच्या गहिनीनाथ गडाच्या सप्ताह समारोपाच्या कार्यक्रमात तसं म्हणाले होते ही, “मी लहान होते, तुम्ही मोठे व्हा.” कृपया त्या असंख्य लेकरांकडे बघा! काही नको त्यांना फक्त 20 मिनिटं वेळ वर्षातून द्या. ते गरीब कोयता घेऊन जातील राबायला आणि मी ही परत येणार नाही. त्यांना काय मिळतं? तर त्यांच्या फाटक्या कुडात राहायची ऊर्जा मिळते, उन्हातान्हात राबायची ताकद मिळते. वेदनेत हसण्याची शक्ती मिळते. त्यांच्या किडकिडीत छातीत अभिमान भरुन नेतात, उर भरुन उत्साह घेऊन जातात. काट्या कुपट्यात, उन्हातान्हात राबतात. कोणी ऊसाच्या फडात तर कोणी राना, कोणी मुंबई सेंट्रलवर 4 बॅगा उचलून घेतं, 3 ऐवजी कोणी चेंबूरमध्ये रात्रभर टॅक्सी चालवतं. कोणी पोलिसवाला राबतो ट्रॅफिकमध्ये नाक्यावर. कष्ट करतात, परंतु हे सर्व भूषणाने स्वाभिमानाने वावरतात. तो स्वाभिमान वाढवणं आपल्याला जमलं तर करावं पण तो हिरावून घेऊ नये हे नक्की. मी कोणासमोर कधीही झुकले नाही पण समाजासाठी नतमस्तक होते आणि विनंती करते, तेवढे क्षण दिवाळीची माहेरची भेट म्हणून मला द्या. माझ्यासाठी नाही पण त्या चेहऱ्यासाठी जे उजळलले राहावेत म्हणून मी संघर्ष यात्रा काढली. यांच्या डोळ्यात अश्रू असे न का पण जिवंतपणा असू देत यासाठी आपण योगदान दिलं पाहिजे. समाज बांधणं जमलं नाही तर तो तोडणं तरी आपण होऊ देऊ नये. भक्तांना त्रास होऊ नये, कोणत्याही माझ्या भावाला इजा होऊ नये, त्यांच्या भावना जपण्यासाठी कृपया विचार करुन सकारात्मक निर्णय घ्याल ही अपेक्षा. शेवटी तुम्ही आणि मी यांच्यामुळेच आहोत व यांच्यासाठी काम करणं आपलं कर्तव्यच आहे.
पंकजा


अहमदनगर । DNA Live24 - ख्रिश्‍चनांनी व मुस्लिमांनी आमचे पूर्वज हिंदू होते. हे कबूल करावे. त्यामुळे सर्व समस्या मिटतील. अकबर व औरंगजेबाच्या इतिहासावर इतिहासात अनेक पुस्तके, प्रकरणे लिहिलेली आढळतात, पण छत्रपती शिवरायांची लढाई, झाशीची राणी लक्ष्मीबाई, विजयनगरची लढाई, महाराणा प्रताप यावरची पुस्तके आढळत नाही. त्यामुळे पुन्हा एकदा वास्तविकतेवर आधारित इतिहास लिहिण्याची गरज आहे. जिथे भारतीय लढले नाहीत, असा भारताचा कोणताही हिस्सा नाही, पण त्याचा इतिहासात उल्लेख आढळत नाही. एकूण हिंदू 80 टक्के आहेत.

हिंदूंची ही संख्या कमी होवू देऊ नका. हिंदूंची ताकद अन्य समुदायांना माहिती आहे. त्यामुळे हिंदू एकत्र येवू नये, त्यांनी संघटित होवू नये, यासाठी अन्यशक्ती, समुदाय प्रयत्न करतात. हिंदूत्वामुळेच आपण सारे एकत्र जोडले जाणार आहोत. कन्याकुमारी पासून काश्मिरपर्यंत सारेजण हिंदूस्थानी आहेत. या सार्‍यांचे गुणसूत्र (डिएनए) एक आहे. आमच्या संस्कृतीचे नावच हिंदूस्थान आहे. त्यामुळे आत्मसन्मानाला ओळखा आपला खरा इतिहास जाणून घ्या, असे रोखठोक प्रतिपादन ज्येष्ठ अर्थतज्ञ, खासदार डॉ. सुब्रह्मणम स्वामी केले.

पंडित दीनदयाळ नागरी सहकारी पतसंस्था व पंडित दीनदयाळ उपाध्याय जन्मशताब्दी समारोह समितीच्यावतीने पंडित दीनदाळ स्मृती व्याख्यानमालेत डॉ. सुब्रह्मणम् स्वामी यांनी ‘राष्ट्रीय आस्मिता व एकात्मता मानवतावाद’ या विषयावर दुसरे पुष्प गुंफले. यावेळी प्रमुख पाहुणे म्हणून शांतीकुमार फिरोदिया मेमोरिअल ट्रस्टचे प्रमुख विश्‍वस्त व उद्योजक नरेंद्र फिरोदिया हे उपस्थित होते. 

राष्ट्रीय स्वयंसेवक संघाच्या जनकल्याण समितीचे अध्यक्ष डॉ.रविंद्र साताळकर, पतसंस्थेचे संस्थापक चेअरमन वसंत लोढा, उपाध्यक्ष गौतम दीक्षित, सचिव विकास पाथरकर, संचालक नरेंद्र श्रोत्री, दीप चंदे, व्याख्यानमाला समितीचे प्रमुख धनंजय तागडे, सुहास मुळे, कमलेश वैकर आदिंसह डॉ. सुब्रह्मणम् स्वामी यांचे व्याख्यान ऐकण्यास माऊली सभागृहात श्रोत्यांनी तुफान गर्दी केली होती.

हिंदूचे रक्षण करणार्‍यालाच मत द्या, आयोध्येमध्ये कोणत्याही परिस्थितीत श्रीराम मंदिर होणार यात कोणताही संदेह नाही. भारतीय राज्य घटनेतील सर्व तरतूदी हिंदू संस्कृतीशी संबंधित असल्याने राज्य घटनेचा अभ्यास करणे महत्वाचे आहे. या तरतूदींची अंमलबजावणी केल्यास भारत नक्कीच हिंदू राष्ट्र होईल, यात शंका नाही, असा विश्‍वास डॉ.सुब्रह्मणम स्वामी यांनी व्यक्त केला.

डॉ. स्वामी म्हणाले की, गो हत्या बंदी, नशाबंदी, तसेच पूजेचा अधिकार घटनेत मुलभूत मानला आहे. मात्र कोणत्याही पूजेने समाजाचे स्वास्थ्य बिघडणार असेल तर त्यावर अंकुश, नियंत्रण सरकार ठेवू शकते. सेक्युलर शब्द राज्य घटनेत नाही. तो शब्द आणीबाणीच्या काळात नंतर घातला गेला. देशातील 40 हजार मंदिरे तोडण्यात आली. पण आयोध्येत श्रीराम मंदिर, काशीचे विश्‍वनाथ मंदिर व मथुरेत श्रीकृष्ण मंदिर अशी तीन मंदिरे करण्याचा निर्धार राष्ट्रीय स्वयंसेवक संघाच्या बैठकीत केला गेला. ही तीनही मंदिरे होणारच आहेत. 

उत्तर प्रदेशात भाजपचे 85 आमदार निवडून आले. कारण तेथील मुस्लिम महिलांनी भाजपला मतदान केले. यामागे या पक्षाला मते दिली तर तिहेरी तलाक बंद होईल हा विश्‍वास मुस्लिम महिलांना होता, म्हणून त्यांनी मते दिली. प्रमुख पाहुणे नरेंद्र फिरोदिया म्हणाले, देशामध्ये पंतप्रधान नरेंद्र मोदी घेत असलेल्या निर्णयांमुळे मोठे बदल होत आहे. यावेळी व्याख्यानमाला समितीचे बाळासाहेब भुजबळ, गौतम कराळे, अशोक बकोरे, मुकुल गंधे, अमर कळमकर आदिंनी परिश्रम घेतले.


अहमदनगर । DNA Live24 - जिल्हा परिषदेच्या वतीने दरवर्षी दिल्या जाणार्‍या आदर्श शिक्षकांची निवड काल मंगळवार (दि. २६) करण्यात आली. जिल्हास्तरीय तपासणी पथकाकडे आलेल्या प्रस्तावाची शिक्षकांच्या परिक्षण अहवालांची सिलबंद पाकिटे काल सदस्य समितीपुढे उघडण्यात आली. लेखी परीक्षचे २५ गुण असे एकून १२५ गुणांचा तक्ता भरून घेण्यात आला. त्याआधारे शिक्षकांची निवड करण्यात आली. या गुणांचा अाधारे एकूण १४ शिक्षक व एका केंद्र प्रमुखांची जिल्हा पुरस्कारासाठी निवड करण्यात आली आहे.

(Facebook पेज व Twitter वर फॉलो करा)

निवड झालेल्यांमध्ये गोपाळे दत्तू रखमाजी (पद्मावती नगर, अकोले), भोकनळ गोरक्ष मल्हारी (गुंजाळवाडी पठार, संगमनेर), खैरे मच्छिंद्र दत्तू (कोकमठाण, कोपरगांव), जाधव जगन्नाथ केसू (खर्डे पाटोळे, राहाता), शेळके श्रीकृष्ण शंकर (गोडेंगांव, श्रीरामपूर), धोंडीभाऊ भिवाजी सुंबे (गणेशवाडी, राहुरी), मिलिंद देविदास जामदार (दत्तवाडी, चांदा, नेवासा), सोमेश्वर हरिभाऊ सोनवणे (खामगांव, शेवगांव), धर्मा नवसाजी बडे (तीन खडी, पाथर्डी), हनुमंत रामराव निबांळकर (पिंपळगांव, जामखेड), विलास तुकाराम सोमवंशी (चंदे खुर्द, कर्जत), अनिल विठ्ठल उंडारे (वाळकी मळा, श्रींगोदा), जया जगन्नाथ कुलथे (पोखरकर, पारनेर), भाऊसाहेब धोंडीबा ठाणगे (हिवरे बाजार, नगर), व केंद्रप्रमुख चंद्रकांत धोेंडीबा कलगुंडे (कोळगांव ता. श्रीगोंदा) यांची निवड करण्यात आली.

या पुरस्कारर्थी शिक्षक व केंद्रप्रमुखांचे जिल्हा परिषदेच्या अध्यक्षा शालिनीताई विखे पाटील, उपाध्यक्ष राजश्रीताई घुले यांनी अभिनंदन केले आहे. ही यादी विभागीय आयुक्तांच्या अंतिम मान्यतेसाठी पाठवली जाईल. यंदाच्या आदर्श शिक्षक पुरस्कार वितरण सोहळ्यावर निंबोडी येथील दुर्घटनेचे सावट आहे. त्यामुळे पुरस्कार वितरण सोहळा पुढे ढकलण्यात आला आहे. 

(Facebook पेज व Twitter वर फॉलो करा)


अहमदनगर । DNA Live24 - शेतकऱ्यांची मुले अधिकारी झाली पाहिजे, भ्रष्ट व्यवस्थेचा बिमाेड करायचा अाहे, स्वामी विवेकानंदांच्या स्वप्नातला भारत घडवायचा अाहे. त्यामुळे यशस्वी अधिकाऱ्यांच्या यशाेगाथा जिद्दी मुलांना एकवून संवाद घडवून अाणण्याचे काम केले जात अाहे. यातून नक्कीच अादर्श अधिकारी निर्माण हाेतील. असे प्रतिपादन सहायक पोलिस निरीक्षक विनाेद चव्हाण यांनी केले. ते नगर वाचनायात अायोजित ग्रेट भेट एक मुक्त संवाद कार्यक्रमात बाेलत हाेते.

 (आमचे Facebook पेज लाईक करा आणि Twitter वर फॉलो करा.)

ग्रामीण व शहरी भागातून स्पर्धा परिक्षांसाठी अालेल्या विद्या‌र्थ्यांचे दिपस्तंभ हाेण्यासाठी चेतना फाऊंडेशनने 'ग्रेट भेट : एक मुक्त संवाद' हा उपक्रम सुरू केला अाहे. केवळ निर्मळ हेतू ठेऊन या उपक्रमाची सुरूवात झाली अाहे. या उपक्रमाचे उद्धाटन श्री चव्हाण यांच्या व्याख्यानाने झाले. यावेळी ते म्हणाले, जिल्हा क्षेत्रफळाने माेठा अाहे. त्यामुळे येथे लाेकसंख्या देखील जास्त असून अल्पभुधारक शेतकरी जास्त अाहे. त्यामुळे बेकारीचे प्रमाण देखील वाढत अाहे. म्हणून मुलगा नाेकरीला लागेल, या अाशेने पालकांनी मुलांना शहराकडे पाठविले. मात्र हे विद्यार्थी शहरात येऊन काय करतात हे नव्याने सांगायला नकाे. 

याेग्य मार्गदर्शन न घेतल्यामुळे अनेकदा अपयश येते. अशा वेळी विद्यार्थी व पालक दाेघे ‌खचून जातात. त्यामुळे तुम्हाला यशस्वी व्हायचे असेल तर तुम्ही िकती वेळ अभ्यास करता. यापेक्षा, कसा अभ्यास करता. हे महत्वाचे अाहे. ते या उपक्रमातून लक्षात येणार अाहे. तसेच मुले अाजकाल २० ते २२ तास अभ्यास करतात. मात्र गुण तशा प्रकारचे मिळत नाही. म्हणून ज्याला िकंमत अाहे. असेच वाचले पाहिजे. शेतात काय पिकते या पेक्षा बाजारात काय िपकते याला महत्व द्या. 

परिक्षेत काय विचारले जाते, पहिला त्याचा अभ्यास करा. मग पुस्तके हताळा, कधी काेणती पुस्तके हताळली पाहिजे, त्यातील नाेट्स कशा असाव्यात, अभ्यासाची वेळ कशी असावी, कुटुंब, मित्र, नातेवाईक व अभ्यास यांच्यातला समन्वय कसा साधायचा हे देखील अॅड. चव्हाण यांनी सांगितले. स्पर्धा परीक्षेसाठी अालेल्या प्रत्येक विद्यार्थ्याने या उपक्रमात सहभाग घ्यावा. अायएएस, अायपीएस, राज्यसेवा अशा अनेक क्षेत्रात यशस्वी झालेल्या अधिकाऱ्यांशी अापल्याला संवाद साधता येताे.

(आमचे Facebook पेज लाईक करा आणि Twitter वर फॉलो करा.)

मनातील प्रश्नांचे उत्तेर मिळतात, यापेक्षा माेठे मार्गदर्शन काेणते नाही. त्यामुळे अादर्श अधिकारी घडविण्याचा वसा घेतलेल्या उपक्रमास व उपस्थित पाचशे िवद्यार्थ्यांना चव्हाण यांनी शुभेच्छा दिल्या. यावेळी चेतना फाऊंडेशनचे अध्यक्ष अमर कळमकर यांनी प्रमुख पाहुण्यांचा सत्कार केला. पत्रकार सागर एस. शिंदे यांनी देखील मार्गदर्शन केले. तर ज्ञानेश्वर अाघाव, गणेश ठाेंबरे, सुनिल िपपळे, एकनाथ शारूख, किरण केदार, भारत गडदे, महेश पटारे, परमेश्वर काकडे, याेेगेश काकडे, शुभम गाेडसे, गणेश दारकुंडे, अदिनाथ खरात यांनी कार्यक्रमाच्या यशस्वीतेसाठी अ‌थक परिश्रम घेतले.

 (आमचे Facebook पेज लाईक करा आणि Twitter वर फॉलो करा.)

अण्णाभाऊ लष्करे युवा प्रतिष्ठाणचे १५० जण शिवसेनेत

अहमदनगर । DNA Live24 - भगवा झेंंडा म्हणजे शिवसेना. पण भगवा झेंडा म्हणजे काय हो ? जो भगवा रंग वापरतो, तो त्यागमयी जीवन जगतो, समाजासाठी त्याग करतो. युवकांचा 'फक्त वापर' हे शिवसेनेचे सूत्र नाही. त्याऐवजी नोकरी, व्यवसायासाठी शिवसेना युवकांच्या पाठीशी कायम उभी असते. पदाधिकाऱ्यांपेक्षा शिवसेनेत शिवसैनिकाला सर्वात मोठा मान आहे, असे प्रतिपादन शिवसेना उपनेते अनिल राठोड यांनी केले.

कोठी, सारसनगर परिसरातील धर्मवीर आण्णाभाऊ लष्करे युवा प्रतिष्ठाणचे बिरजू जाधव यांनी १५० युवकांसोबत शिवसेनेत प्रवेश केला. त्याबद्दल त्यांचे स्वागत शिवसेना उपनेते अनिल राठोड यांच्या हस्ते करण्यात आले. या प्रसंगी शहर प्रमुख दिलीप सातपुते सभागृह नेता गणेश कवडे, माजी प्रथम महापौर भगवान फुलसौंदर, नगरसेवक सचिन जाधव, मनोज दुलम, दिंगबर ध्वन, अनिल बोरुडे, संभाजी कदम, युवासेना शहर प्रमुख ऋषभ भंडारी, राजू देठे, आदी उपस्थित होते.

 (आमचे Facebook पेज लाईक करा आणि Twitter वर फॉलो करा.)

राठोड म्हणाले, शिवसेना जातीवादी असल्याचा खोटा प्रचार इतर पक्ष करतात. शिवसेना हिंदूत्वाला, धर्माला मानते. याचा अर्थ दुसऱ्या धर्माला मानत नाही असा होत नाही. या देशामध्ये जी लोक राहतात त्यांचा धर्म हिंदू . धर्म कोणताही असो सर्वाचा धर्म महत्वाचा आहे. पक्ष कधीच वाईट नसतो किंवा संघटना कधीच वाईट नसते. नेतृत्व करणारे चांगले असले पाहिजे म्हणून शिवसेनेत युवकांचा कौल कायम वाढतच असतो. सर्व धर्माची शिवसैनिक शिवसेनेत आहे.

शिवसेनेत एकाच कुटुंबाचे वर्चस्व नाही सर्व सामान्याची शिवसेना. सामान्य माणसला मोठे करणारी शिवसेना. आपण सर्वानी समाजाचे, मुलींचे, माताचे, भगिणीचे, धार्मिक स्थळाचे संरक्षण करणे गरजेचे आहे. धार्मिक स्थळामध्ये गुंड लोक घुसलेली आहे. फादर यांना मारहाणीचे प्रकार झालेत आणि हे प्रकार धर्म म्हणून शिवसेना कधीच खपवून घेणार नाही. कोणत्याही कामासाठी अडचणीसाठी तुम्ही मला समक्ष भेटू शकता. कोणालाही सोबत आणण्याची गरज नाही.

 (आमचे Facebook पेज लाईक करा आणि Twitter वर फॉलो करा.)

सर्वांना न्याय देण्यासाठी शिवसेना खंबीर आहे. शहरामध्ये अनेक पक्ष आहेत पण शिवसेनेतच कायम सामान्याना न्याय मिळतो. तरुण आणि विचारवंताचा सहभाग शिवसेनेत आहे. त्यामुळे शिवसेनेची ताकद कायम वाढतच आहे, असे मनोगत शिवसेना शहर प्रमुख दिलीप सातपुते यांनी व्यक्त केले. कार्यक्रमांचे सुत्रसंचालन शिक्षक सेनेचे पारुनाथ ढोकळे यांनी केले. तर आभार सभागृह नेता गणेश कवडे यांनी मांडले.

 (आमचे Facebook पेज लाईक करा आणि Twitter वर फॉलो करा.)


राहुरी । DNA Live24 - ज्याठिकाणी शेतीबरोबरच पशुपालन व्यवसाय केला जातो, त्याठिकाणी शेतकरी आत्महत्या करण्याचे प्रमाण कमी आहे. त्यामुळेच शेतकऱ्यांना बळ देण्यासाठी पशुपालन, दुग्धविकास आणि मत्स्यव्यवसायाच्या माध्यमातून शेतकऱ्यांना स्वयंपूर्ण करण्याचे राज्य शासनाचे धोरण आहे. चारायुक्त शिवार, मासळीयुक्त तलाव आणि मागेल त्याला पोल्ट्री अशा पद्धतीने आता  काम केले जात आहे. अनुदानावर अवलंबून राहण्यापेक्षा शेतकरी स्वावलंबी झाला पाहिजे, असे प्रतिपादन राज्याचे पशुसंवर्धन, दुग्धविकास व मत्स्यव्यवसाय मंत्री महादेव जानकर यांनी केले.

 (आमचे Facebook पेज लाईक करा आणि Twitter वर फॉलो करा.)

महात्मा फुले कृषी विद्यापीठ, राहुरी आणि राज्य शासनाचा कृषी विभाग यांच्या वतीने विद्यापीठात न्यू इंडिया मंथन- संकल्प से सिद्धी आणि उन्नत शेती समृद्ध शेतकरी या अंतर्गत या किसान आधार संमेलनाचे आयोजन करण्यात आले आहे. त्यातील तांत्रिक चर्चासत्राचे उद्धाटन जानकर यांच्या हस्ते झाले. त्यावेळी ते बोलत होते. 

या विद्यापीठाचे कुलगुरु डॉ. के. पी. विश्वनाथा, माजी कुलगुरु डॉ. एस. एन. पुरी, डॉ. मायंदे, बागलकोट येथील उद्यानविद्या विद्यापीठाचे कुलगुरु टी. एल. माहेश्वर आणि विस्तार शिक्षण संचालक वाय. के. कोटीकल, आदर्श गाव योजनेचे कार्यकारी अध्यक्ष पोपटराव पवार, वाल्मीचे महासंचालक तथा मृद व जलसंधारण विभागाचे आयुक्त एच. के. गोसावी, जिल्हा परीषदेचे कृषी व पशुसंवर्धन सभापती अजय फटांगरे, विद्यापीठाचे विस्तार शिक्षण संचालक डॉ. किरण कोकाटे आदींची यावेळी उपस्थिती होती.

 (आमचे Facebook पेज लाईक करा आणि Twitter वर फॉलो करा.)

यावेळी जानकर म्हणाले, कृषी तंत्रज्ञानाचा उपयोग बांधावरील शेतकऱ्यांना झाला पाहिजे, त्यासाठी हे तंत्रज्ञान त्यांच्यापर्यंत पोहोचणे आवश्यक आहे. शेतीतील उत्पन्न वाढवावयाचे असेल तर कृषीपूरक उद्योगाशिवाय पर्याय नाही. त्यासाठी शेळीपालन, कुक्कुटपालन, दुग्धव्यवसाय आणि मत्स्यबीजसंवर्धनास राज्य शासनाने महत्व दिले आहे. पशुपालक ग्रामविकास योजनेचा आराखडा तयार आहे. त्यामुळे शेतकऱ्यांनी दूध सरकारी दूधसंस्थांना द्यावे. आता राज्य शासन स्वताचा आरे ब्राण्ड विकसित करीत असल्याची माहिती त्यांनी दिली.

साखरेसाठी असलेले 70:30 हे धोरणच आता दूध क्षेत्रासाठी लागू करणार असल्याचे सांगून जानकर म्हणाले की, त्यामुळे 70 टक्के पैसे हे शेतकऱ्यांना मिळतील तर 30 टक्के रक्कम ही प्रोसेसिंगसाठी असेल. राज्यातील पशुवैद्यकीय अधिकाऱ्यांच्या जागाही लवकरच भरण्यात येतील, असे सांगून शेळी मेंढी महामंडळ आणि मत्स्यबीज महामंडळ चांगल्या कामांमुळे नफ्यात आल्याचे त्यांनी आवर्जून नमूद केले.

 (आमचे Facebook पेज लाईक करा आणि Twitter वर फॉलो करा.)

ताज्या बातम्या

[recent][timeline]

संपर्क फॉर्म

नाव

ईमेल *

संदेश *

Blogger द्वारा समर्थित.
Javascript EnablePlease Enable Javascript To See All Widget